Written by طفولة صعبة
اتولد (رونالدو دي ليما) في 18 سبتمبر سنة 1976 في أسرة فقيرة في “ريو دي جانيرو”، وفضل حياة (رونالدو) صعبة بسبب الفقر، وكان الحاجة الوحيدة الي بتهون عليه هي لعبه للكورة في الشوارع والحارات الي جنب بيته
ودخله اهله المدرسة الحكومية الي في الحي، وكانت مصاريفها صعبة عليهم، بس فضل (رونالدو) في المدرسة لحد ما وصل سنه 11 سنة، وهنا قرر ابوه ان العيشة دي صعبة ومش عارف يجيب مصاريف منين، عشان ينفصل عن ام (رونالدو) ويسيب العيلة وراه ويمشي
ولأن ظروف العيشة كانت صعبة ومفيش فلوس، ساب (رونالدو) المدرسة عشان يساعد عيلته، ومكانش ليه في الحياة غير انه يلعب كورة في الشوارع عشان يلم ملاليم، يساعد بيهم اخواته الاتنين وأمه، وهنا بدأ حبه للكورة الي هتساعده طول حياته
وفي عمر ال 12 سنة انضم (رونالدو) لأول فريق ليه في حياته، وكان فريق محلي اسمه “ساو كريستوفاو”، عشان كل الي يشوفه يشوف فيه (بيليه) جديد للكورة البرازيلية
بداية المسيرة
وفي أواخر سنة 1991 انضم (رونالدو) لأول مرة في حياته لفريق محترف بيلعب في الدوري البرازيلي اسمه “كويرزيرو”، ومن هنا بدأت أسطورة رونالدو، الي اتسمي بعد كدا بالظاهرة بسبب قوته الهجومية الي محدش قدر يقف ادامها في جيله
وفي سنة 1992 ضمه منتخب البرازيل تحت 17 سنة عشان يلعب مع جيل من أعظم أجيال البرازيل في التاريخ، بعد كدا يتصعد للمنتخب الأول، وبيتابع ماتشاته كشافين كتير، لحد ما أعجب بيه كشافين نادي “بي اس في” الهولندي وقدمو عرض رسمي سنة 1994، عشان يلعب (رونالدو) لأول مرة في حياته برا البرازيل
وعشان تعرف اد ايه كان (رونالدو) لعيب مؤثر في كل الفرق الي لعب فيها، فأول موسم ليه في “بي اس في” قدر (رونالدو) انه يسجل 55 هدف في 56 ماتش بس، يعني بمعدل تقريباً هدف كل مباراة، عشان يساعد “بي اس في” انها تفوز بالدوري وتكسر هيمنة فريق “أياكس” في هولندا
وفي تاني موسم ل(رونالدو) مع “بي اس في” سنة 1966 قدر انه يكسب مع الفريق كأس هولندا عشان كله يعرفه، وتقرر إدارة “برشلونة” إنها تتعاقد معاه، ومن هنا بتبدأ رحلته للعالمية
وفي أول موسم ليه في اسبانيا، ومع ان البعض توقع انه هيفشل في اسبانيا، بس (رونالدو) كان ليه رد تاني لما سجل 34 هدف في 37 مباراة، بس هنا ابتدت مأساته مع إصابات الركبة، واتصاب عشان يكمل الموسم بيتعالج ومشاركش في لقاءات كتير
وفي آخر الموسم عرضت إدارة نادي “إنتر ميلان” 27 مليون على “برشلونة” الي وافق على بيعه رغم إعتراض معظم الجماهير الي شافو في (رونالدو) هدافهم التاريخي، عشان تقيل “برشلونة” المدرب وتعين بعده (فان جال)
في نفس السنة الي هي 1997، قدر (رونالدو) الي حطم كل الارقام، حتى رقم سوق الانتقالات “٢٧ مليون” إنه يفوز بجايزة الفيفا لأفضل لاعب في السنة، بس بدأت الإشاعات تحاربه عن علاقته بالموديل البرازيلية(سوزانا) الي اتعرف عليها،بعد ما شافها بتمثل على التلفزيون البرازيلي، عشان يطلع (رونالدو) يأكد القصة
وعلى اد ما حياة (رونالدو) العاطفية كانت متشتتة زي ما عاش طفولة مشتتة وهو صغير، الا انه في سنة 1998 انضم للمنتخب في قائمة كأس العالم، عشان يبقى تاني كأس عالم يحضره، بعد ما انضم سنة 1994 من غير ما يشارك في اي دقيقة
وكان مشاركات (رونالدو) مع البرازيل في البطولة مميزة لحد ما وصل بيهم لدور نص النهائي، بس قبل الماتش بساعات، رجعت إصابته تاني، عشان يبعت مدرب المنتخب قايمة المباراة الي هتبدأ من غير اسم (رونالدو)
وطلعت إشاعات بتقول ان السبب الرئيسي لغياب (رونالدو) كان انه عرف خبر عن صديقته إنها بتخونه، بس محدش أكد الاخبار دي، وقدر (رونالدو) انه يتحامل على نفسه لحد ما صمم انه جاهز لماتش فرنسا، عشان يشارك اساسي، بس بان تايه في الملعب، وخسرت البرازيل 3_0 عشان تطلع من كأس العالم
لعنة الإصابات
فضلت مسيرة (رونالدو) الخرافية مكملة مع “انتر ميلان” لحد سنة 2000 الي بدأت لعنة الإصابات تطارد (رونالدو) من غير رحمة، وفضل (رونالدو) يقوم من كل إصابة أقوى
في ديسمبر سنة 1999 اتصاب (رونالدو) في ركبته لتاني مرة، والمرة دي كان لازم يعمل عملية جراحية، وغاب بعدها عن الملاعب خمس شهور، لحد اليوم المشئوم، يوم 12 أبريل 2000
بدأ (رونالدو) على دكة البدلاء في ماتش (انتر ميلان)و(لازيو)، وبمجرد ما نزل بدأ يمارس عادته في المراوغة والجري كان محصلش حاجة قبل كدا، بس في مرة من مرات المراوغة ومن غير ما يلمس اي لاعب، يقع (رونالدو) على الأرض وهو بيصرخ وبيشاور على ركبته
ونزل المسعفين من الدكة عشان يبلغو الجهاز الفني، ان (رونالدو) مش هيقدر يكمل عشان يتشال ويخرج من الملعب وهو بيعيط بعد ما بدأ يحس ان مسيرته هتخلص بدري
وفي سنة 2018 في لقاء مطول مع موقع (فور فور تو) قال طبيب “انتر ميلان” الي كان موجود وقت الإصابة(نيلتون بيترون) قال ان الي حصل مع (رونالدو) هي اسوأ إصابة حصلت لأي لاعب كورة في التاريخ، ولو حد شاف صور آشعة الركبة الي اتعملت وقتها مش هيصدق ان الشخص دا قدر يقف على رجله تاني
وبيكمل ان بعد العملية ما اتعملت، كان حجم ركبة (رونالدو) تقريبا في حجم الكورة، وكان دايما (رونالدو) بيطلب مورفين عشان يسكن الألم الفظيع شوية، بس في وسط كل دا، اتصل (رونالدو) ب(نيلتون) وسأله ازاي يرجع يلعب كورة تاني، عشان يبان اد ايه كانت عقليته قتالية حتى في أسوأ الأوقات، والألم
وعلى الرغم ان كل الأطباء، حتى العلم وقتها قال ان مستحيل (رونالدو) يلعب كورة تاني، وهيبقى محظوظ لو قدر يمشي على رجله من جديد، بس (رونالدو) الي عود الناس كلها على الحرب والكفاح، رجع بعد ما بدأ يتدرب تدريجي لحد ما رجع للملاعب من جديد
وبينضم (رونالدو) لقايمة كأس العالم في سنة 2002 مع البرازيل، عشان يقدم مستوى خرافي، ويفوز بكأس العالم مع المنتخب وهو هداف البطولة ب ٨ اهداف عشان يطلق عليه الجماهير لقب الظاهرة، مش بس عشان أدائه الفني الخارق، لكن عشان بيرجع من كل إصابة أقوى من الي قبلها
وبعد البطولة الخرافية الي قدمها، بيقدمله (ريال مدريد) عرض عشان يضمه لجيل “الجلاكتيكوس” الخارق الي كان بيتكون وقتها، وطبعاً لأن (رونالدو) كان لعب قبل كدا في أسبانيا مع “برشلونة”، ولأنه لاعب مش
عادي قدر ينسجم مع مجموعة كبيرة من اللعيبة الي على مستوى عالي، عشان يحطم معاهم أرقام كتير ويفوز بالدوري مرتين، بس لعنة الإصابات مش بترحمه
وبينضم (رونالدو) لقايمة البرازيل في كاس العالم 2006، بس المرة دي محدش بيكون مؤمن انه يقدر يعمل حاجة، بسبب وزنه الزايد من كتر الإصابات، والعلاج بالكورتيزون، بس (رونالدو) بيرد على كل الي بيشكك فيه، لما يحطم الرقم القياسي لاكتر لاعب سجل اهداف في مباريات كأس عالم، ويحفر اسمه بحروف من دهب ب15 هدف
وبعدها بيقرر (رونالدو) يرجع إيطاليا تاني، بس المرة دي من بوابة “اي سي ميلان” بس بعد عدد مباريات قليل، بيتصاب في نفس الركبة تاني، عشان ينصحه كل المشجعين انه يعتزل، وكفاية البطولات الي حققها
وبتقرر إدراة “اي سي ميلان” انها تفسخ عقده بعد خوفهم من تكرر الإصابات وانه هيبقى مجرد رقم في قايمة الفريق، بس (رونالدو) بيعمل العملية ويقرر يثبت ان الكل غلط تاني، وبيثق في قدرته عشان يرجع من جديد من بوابة نادي”كورينثياس” ويسجل 30 هدف في 55 مباراة
وعلى الرغم ان المعظم كان بيتنمر على (رونالدو) عشان وزنه الي بيزيد بعد الإصابات وغالباً لفترات طويلة، بس الظاهرة قدر يكسب احترام الجميع،و وفقاً للاحصائيات فكفاية انك تعرف من (رونالدو) في مسيرته الاحترافية كلها، مضيعش انفراد واحد بالحراس
واي رياضي يعرف ان إصابة الركبة صعب جداً الرجوع بعدها للمستوى، ومثال كبير على كدا كان (مايكل أوين) الي كان في قمة مجده، لحد ما اتصاب في أربطة الركبة وبعد العملية قال انه مش قادر يتخيل إصابة تانية زي دي، وقرر انه يعتزل بعدها
بس مش دا الي (رونالدو) عمله، (رونالدو) الظاهرة اثبت ان الخسران الوحيد هي الأندية الي مآمنتش بيه وبموهبته
وفي 2011، خرج فريق “كورينثياس” من البطولة القارية، عشان تبدأ الجماهير الهجوم عليه، وتنمرو على وزنه الزايد من جديد، عشان يطلع (رونالدو) في لقاء يوضح ان الي حصله دا كان بسبب تكرار الإصابات، وتكرار الأدوية الي دخلت جسمه في وقت قصير
وقال انه كان يقدر يتغلب على الوزن الزيادة، بس عن طريق أدوية ممنوعة في الكورة، وعشان حبه للكورة، قرر انه يسيب شوية جمهور ناكر للجميل يتنمر عليه بعد كل تاريخه المشرف، ورفض ياخد الأدوية الي هتمنعه من لعب الكورة
عشان يعلن (رونالدو الظاهرة) اعتزاله للكورة، وهو على قمة احسن مهاجم في تاريخ الكورة، ولو فاكر ان دي مجاملات، فدي تصريحات من اللعيبة الي لعبت معاه، سواء في أسبانيا، أو إيطاليا
رأي زملائه
قال عنه (زيدان) ان الظاهرة هو احسن لاعب ممكن اي حد يتفرج عليه
وكمان (راؤول) الي لعب معاه في ريال مدريد، وكان الهداف التاريخي لريال مدريد، قال انه محظوظ عشان بيلعب مع (رونالدو) عشان يتعلم منه
دا غير ان اي مدافع لعب ضده كان بيقول انه زي الكابوس، ولاعب بموتور فيراري، مستحيل يتراقب طول الماتش
بعد الاعتزال
وبعد الاعتزال قرر (رونالدو) انه يعيش الحياة الي اتحرم منها طول العمر، اما بسبب اللعب او الإصابات، واكيد بسبب الفقر الي عاش فيه طول عمره
ودايما بتلقط الكاميرات (رونالدو) وهو بيستمتع بوقته على الشواطئ او كمان في حضور لماتشات مهمة في الملاعب الي لعب فيها، ودايما بيستقبله الجمهور استقبال الابطال تكريما لمسيرته الي كانت عبقرية
ومكتفاش (رونالدو) في الكورة انه بس يبقى لاعب، وقرر انه يشتري 82% من أسهم نادي “بلد الوليد” في الدوري الإسباني، ويبقى كمان رئيس النادي، وعضو شرفي للفيفا في كل حفلاتها
عشان يكون (رونالدو) مش بس لاعب خارق بإجماع الكل، دا كمان قدر انه يحارب الفقر الي عاش فيه وهو صغير، عشان يطلع من أحياء (ريو دي جانيرو) الفقيرة للسهرات والحفلات في (ايبيزا) وكمان يبقى رئيس نادي كبير في أسبانيا
ومش الفقر بس، (رونالدو) حارب لعنة إصابات الركبة لاكتر من 12 سنة، بدون ما يشتكي او يعتزل او حتى يشكك في الجهاز الطبي لفريقه
عشان يبقى مثال لأي لاعب او رياضي، واي مهاجم كرة قدم بالخصوص
عايزين نقـــــــول أيــــــــــــه
:هل كان ممكن نعمل حاجة في إصابة رونالد
مثلا لو كان عنده سجل رياضي موثق يشمل سجلة الطبي – ده كان يمكن يساعد؟
لو اتعرضت حالته علي موقع بيناقش إصابات اللاعب
لو خلينا الجمهور يتفاعل مع حالة الإصابة علشان يكون فاهم و يقدر
بس لاحظنا تأثير الجمهور الكبير في رفض رحيل رونالدوا و ال كانت نتيجته رحيل المدرب وكمان نقدر نساعد في استثمار اللاعب بعد الاعتزال
علشان كده منصتنا About us – (heyagoal.com) تقدم حلول متنوعة كونها موطن لصناع الكرة – هتلاقي خبراء إصابات الملاعب – وخبرات الآخرين يما يتعلق بالاصابات وكمان الطب البديل وغيره من الحلول بما فيها افضل استثمار لمحترفي الكرة
في عيون كتيرة اوى بتشوف مرة واتنين وعشرة المهارات مهما كانت الصعاب – فمهمتنا تطوير طريقة اكتشاف المهارات وتسهيل انتقال المحترفين وإيجاد سجل رياضي موثق والوصول الي رؤيتنا كوننا موطن لجميع عناصر صناعة الكرة
